ഹൃദയാഘാതത്തെ തുടര്ന്നു അന്തരിച്ച കന്നഡ നടന് പുനീത് രാജ്കുമാറിന് ആദരവുമായി ആമസോണ് പ്രൈം വീഡിയോ. നടന്റെ പ്രൊഡക്ഷന് ബാനറായ പി ആര് കെ പ്രൊഡക്ഷന്സ് നിര്മ്മിക്കുന്ന മൂന്ന് സിനിമകള് പ്രീമിയര് ചെയ്യുമെന്ന് ആമസോണ് പ്രൈം അറിയിച്ചു. ഇതിനോടൊപ്പം പുനീത് നായകനായെത്തിയ അഞ്ച് ജനപ്രിയ സിനിമകള് പ്രൈം സബ്സ്ക്രൈബ് ചെയ്യാത്ത പ്രേക്ഷകര് ഉള്പ്പെടെ എല്ലാവര്ക്കും സൗജന്യമായി കാണാമെന്നും ആമസോണ് വ്യക്തമാക്കി. ഫെബ്രുവരി 1 മുതല് ഒരു മാസത്തേക്കാണ് സിനിമ കാണാന് സാധിക്കുക.
“പുനീതിന്റെ സിനിമാ സ്വപ്നം മുന്നോട്ട് കൊണ്ടുപോകാനും അദ്ദേഹത്തിന്റെ ചില മികച്ച ചിത്രങ്ങള് ആരാധകരിലേക്ക് എത്തിക്കാനുമാണ് ലക്ഷ്യമിടുന്നത്” എന്നാണ് ആമസോണ് ഇസ്റ്റാഗ്രാമില് പങ്കുവച്ച കുറിപ്പില് വ്യക്തമാക്കിയിരിക്കുന്നത്.
പി ആര് കെ നിര്മ്മിക്കുന്ന മാന് ഓഫ് ദ മാച്ച്, വണ് കട്ട് ടു കട്ട്, ഫാമിലി പാക്ക് എന്നീ സിനിമകളാണ് ആമസോണില് സ്ട്രീം ചെയ്യുക. പുനീത് നായകനായെത്തിയ ലോ, ഫ്രഞ്ച് ബിരിയാണി, കവലുദാരി, മായാബസാര്, യുരത്ന എന്നിവയുള്പ്പെടെ അഞ്ച് ജനപ്രിയ സിനിമകളും പ്രദര്ശനത്തിനുണ്ടാകും. ഒക്ടോബര് 29ന് ഹൃദയാഘാതത്തെ തുടര്ന്നാണ് പുനീത് രാജ്കുമാറിന്റെ അന്ത്യം. 46 വയസായിരുന്നു. ജിമ്മില് വച്ച് ആരോഗ്യ അസ്വസ്ഥതകള് ഉണ്ടായതിനെ തുടര്ന്നായിരുന്നു ആശുപത്രിയില് പ്രവേശിപ്പിച്ചത്.