ദൃശ്യം 2 എന്ന വൻ ഹിറ്റിനു ശേഷം മോഹൻലാലിനെ നായകനാക്കി ജീത്തു ജോസഫ് സംവിധാനം ചെയ്ത ചിത്രമാണ് “ട്വൽത്ത് മാൻ”. ചിത്രം ഡിസ്നി പ്ലസ് ഹോട്ട്സ്റ്റാറിലൂടെ ഒടിടി റിലീസിന് ഒരുങ്ങുന്നു എന്ന തരത്തിലുള്ള റിപ്പോർട്ടുകളാണ് ലെറ്റ്സ് ഒടിടി ഗ്ലോബൽ ട്വിറ്റർ പേജിലൂടെ വെളിയിൽ വരുന്നത്. സിനിമയുടെ റിലീസ് ഉടൻ ഉണ്ടാകുമെന്നും സൂചന നൽകുന്നുണ്ട്. എന്നാൽ സിനിമയുടെ അണിയറപ്രവർത്തകരിൽ നിന്ന് ഔദ്യോഗികമായ പ്രഖ്യാപനം ഉണ്ടായിട്ടില്ല.
ദൃശ്യം 2 എന്ന വൻ ഹിറ്റ് ചിത്രത്തിന് ശേഷം മോഹൻലാലും ജീത്തു ജോസഫും ഒന്നിക്കുന്ന ചിത്രമാണ് ട്വൽത്ത് മാൻ. കഴിഞ്ഞ വർഷം ഓഗസ്റ്റിലാണ് സിനിമയുടെ ചിത്രീകരണം ആരംഭിച്ചത്. 24 മണിക്കൂറിനുള്ളിൽ നടക്കുന്ന ഒരു കഥയാണ് ചിത്രമെന്ന് ജീത്തു ജോസഫ് റിപ്പോർട്ടർ ലൈവുമായുള്ള അഭിമുഖത്തിൽ പറഞ്ഞിരുന്നു. ഒരു ലൊക്കേഷൻ തന്നെയാണ് സിനിമയിൽ കൂടുതലും ഉള്ളത്.
Mohanlal + Jeethu Joseph = 🔥 pic.twitter.com/3LkfKw4L2r
— LetsOTT Global (@LetsOTT) February 21, 2022
അനുശ്രീ, അദിതി രവി, ഷൈൻ ടോം ചാക്കോ, സൈജു കുറുപ്പ്, വീണ നന്ദകുമാർ, ശിവദ നായർ തുടങ്ങിയവരാണ് ചിത്രത്തിലെ മറ്റു കഥാപാത്രങ്ങളെ അവതരിപ്പിക്കുന്നത്. ആശിർവാദ് സിനിമാസിന്റെ ബാനറിൽ ആന്റണി പെരൂമ്പാവൂർ ആണ് ചിത്രം നിർമിക്കുന്നത്.
കെ ആർ കൃഷ്ണകുമാറാണ് ചിത്രത്തിന്റെ തിരക്കഥയെഴുതുന്നത്. പശ്ചാത്തലസംഗീതം അനിൽ ജോൺസണുമാണ്. സതീഷ് കുറുപ്പ് ആണ് ചിത്രത്തിന്റെ ഛായാഗ്രാഹണവും രാജീവ് കോവിലകം ചിത്രത്തിന്റെ കലാസംവിധാനവും നിർവഹിക്കുന്നു. ജീത്തുവാണ് ചിത്രത്തിന്റെ കോസ്റ്റ്യൂം ഡിസൈൻ.