ബോളിവുഡില്‍ നായക നടന്മാരുടെ പട്ടികയില്‍ ഒന്നാം സ്ഥാനത്താണ് അക്ഷയ് കുമാര്‍. ബോളിവുഡിന്‍റെ സമീപകാല ചരിത്രത്തില്‍ ഏറ്റവുമധികം സാമ്പത്തിക വിജയങ്ങള്‍ നേടിയ താരം ചെയ്യുന്ന സിനിമകളുടെ എണ്ണത്തിലും മുന്നിലാണ്. ഫര്‍ഹാദ് സാംജിയുടെ സംവിധാനത്തില്‍ നായകനാവുന്ന ബച്ചന്‍ പാണ്ഡേയാണ് അക്ഷയ്‍യുടേതായി ഇനി പുറത്തുവരാനുള്ള ചിത്രം. കാര്‍ത്തിക് സുബ്ബരാജിന്റെ ജിഗര്‍ തണ്ഡയില്‍ നിന്ന് പ്രചോദനം ഉള്‍ക്കൊണ്ടിട്ടുള്ള ചിത്രമാണ് ബച്ചന്‍ പാണ്ഡേ.
കൊവിഡ് മൂന്നാം തരംഗത്തെത്തുടര്‍ന്ന് നീട്ടുവെക്കുകയായിരുന്നു ചിത്രം ഹോളി റിലീസ് ആയി മാര്‍ച്ച് 18ന് എത്തുമെന്നാണ് നിലവില്‍ പ്രഖ്യാപിക്കപ്പെട്ടിരിക്കുന്നത്. റിലീസിന് അഞ്ച് ആഴ്ചകള്‍ മാത്രം ശേഷിക്കെ ചിത്രത്തെക്കുറിച്ചുള്ള പല വിവരങ്ങളും റിപ്പോര്‍ട്ടുകളായി പുറത്തെത്തുന്നുണ്ട്. അക്ഷയ് കുമാറിന്‍റെ പ്രതിഫലക്കാര്യമാണ് ഏറ്റവും പുതിയതായി വരുന്ന റിപ്പോർട്ടുകളിൽ ശ്രദ്ധേയമായത്.
ബോളിവുഡില്‍ നിലവില്‍ ഏറ്റവുമധികം പ്രതിഫലം വാങ്ങുന്ന താരം അക്ഷയ് കുമാര്‍ ആണ്. ബച്ചന്‍ പാണ്ഡേയിലെ നായക കഥാപാത്രത്തെ അവതരിപ്പിക്കാന്‍ അദ്ദേഹം 99 കോടിയാണ് വാങ്ങിയിരിക്കുന്നതെന്നാണ് പുറത്തെത്തിയിരിക്കുന്ന റിപ്പോര്‍ട്ടുകള്‍. എന്നാല്‍ ഇതില്‍ കൂടുതല്‍ പ്രതിഫലം അദ്ദേഹം മറ്റു പല ചിത്രങ്ങള്‍ക്കും വാങ്ങിയിട്ടുണ്ട്. വരാനിരിക്കുന്ന ‘മിഷന്‍ സിന്‍ഡറെല്ല, ബഡെ മിയാന്‍ ഛോട്ടെ മിയാന്‍ എന്നീ ചിത്രങ്ങള്‍ക്ക് അക്ഷയ് വാങ്ങിയിരിക്കുന്നത് 135 കോടി വീതമാണ്. ബെല്‍ബോട്ടത്തിന് 117 കോടിയും. സൂര്യവന്‍ശിക്ക് 70 കോടിയും. ചെറു ചിത്രങ്ങള്‍ക്ക് പ്രതിഫലം കുറച്ചുകൊണ്ട് പ്രോഫിറ്റ് ഷെയറിംഗ് രീതിയിലും അക്ഷയ് കുമാര്‍ ഡേറ്റ് കൊടുക്കുന്നുണ്ട്.
നദിയാദ്‍വാല ഗ്രാന്‍ഡ്‍സണ്‍ എന്‍റര്‍ടെയ്‍‍ന്‍‍മെന്‍റിന്‍റെ പശ്ചാത്തലത്തില്‍ സാജിദ് നദിയാദ്‍വാലയാണ് നിര്‍മ്മാണം. കൃതി സനോണ്‍, ജാക്വലിന്‍ ഫെര്‍ണാണ്ടസ്, അര്‍ഷാദ് വര്‍സി, പങ്കജ് ത്രിപാഠി, പ്രതീക് ബാബര്‍, അഭിമന്യു സിംഗ് തുടങ്ങിയവര്‍ അഭിനയിച്ചിരിക്കുന്നു.
