നീണ്ടനാളത്തെ ഇടവേളക്കുശേഷം ബോളിവുഡ് താരം ഷാരൂഖ് ഖാൻ നായകനാകുന്ന പുതിയ ചിത്രം തീയ്യറ്ററുകളിലേക്ക് വരുന്നു. “പത്താൻ” എന്ന ചിത്രവുമായി ബന്ധപ്പെട്ട് വെളിയിൽ വരുന്ന ഏറ്റവും പുതിയ വാർത്തകൾ റിലീസ് തീയതി പ്രഖ്യാപിച്ചു എന്നതാണ്. സിനിമയുടെ ടീസറിനൊപ്പമാണ് അണിയറപ്രവർത്തകർ റിലീസ് തീയതി പങ്കുവെച്ചത്. അടുത്ത വർഷം ജനുവരി 25നാണ് ചിത്രം എത്തുക.
നാല് വർഷത്തിന് ശേഷം റിലീസിന് ഒരുങ്ങുന്ന ഷാരൂഖ് ചിത്രമാണ് പത്താൻ. ദീപിക പദുകോൺ, ജോൺ എബ്രഹാം എന്നിവരും സിനിമയിൽ പ്രധാന കഥാപാത്രങ്ങളാകുന്നുണ്ട്. ജോണും ദീപികയും പത്താനെ പരിചയപ്പെടുത്തുന്നതാണ് ടീസർ, സ്വന്തം രാജ്യത്തെ സംരക്ഷിക്കുക എന്നതാണ് അയാളുടെ ഒരേയൊരു ലക്ഷ്യമെന്ന് ഇരുവരും പറയുമ്പോൾ മുഖം വ്യക്തമാക്കാതെ ഷാരൂഖ് ഖാൻ നടന്നു വരുന്നതും കാണാം.
ഷാരൂഖ് ഖാനും ടീസർ സമൂഹ മാധ്യമങ്ങളിലൂടെ പങ്കുവെച്ചിട്ടുണ്ട്. “അൽപ്പം വൈകിയെന്ന് അറിയാം. എന്നാലും ഈ തീയതി ഓർത്തുവെച്ചോളൂ. 2023 ജനുവരി 25ന് തിയേറ്ററുകളിൽ കാണാം”, എന്ന് താരം കുറിച്ചു.
സൽമാൻ ഖാനും അതിഥി വേഷത്തിൽ എത്തുന്ന ചിത്രത്തിന്റെ സംവിധായകൻ സിദ്ധാർഥ് ആനന്ദാണ് . ‘സീറോ’ എന്ന ആനന്ദ് എൽ റായ് ചിത്രമാണ് ഷാറൂഖ് ഖാന്റേതായി ഒടുവിൽ റിലീസ് ചെയ്തത്. ചിത്രത്തിൽ കത്രീന കൈഫ്, അനുഷ്ക ഷർമ്മ എന്നിവരായിരുന്നു നായികമാർ.
